Búkũ nô Márãkõ îgĩ nĩ, gólâ kpá ĩꞌdî zị̃lị́ Yõwánĩ Márãkõ rî. Gõlâ drẽ ãgô mvá ró Yẽrõsãlémã ꞌálâ Yésũ õtírĩ ꞌbãâ tólâ rî, gólâ âꞌdô trá tã âríꞌbá Yésũ kâ ró. ꞌDĩî vósĩ, gólâ drí âꞌdózó lôsĩ ꞌẽlé kpãkã ãlô lãjóꞌbá Póõlõ bê. Gõꞌdá vólé drị̃ lâ ꞌásĩ, gólâ drí lãjóꞌbá Pétẽrõ rî pãzó. Tã rĩrĩ Yésũ kâ ꞌá rî, gólâ âꞌdâ tã ífí úlị́ dũû gõꞌdá lãꞌbí Yúdạ̃ yí kâ rî kâ trá. Ĩtí rî, gólâ îgĩ tã ꞌdî âꞌdô ró õjílã gólĩyî âꞌdó ꞌbá trá krístõ ꞌbá ró õrĩ Yúdạ̃ yí kâ ꞌásĩ kô rî pãzó.
Búkũ nô ꞌá rî Márãkõ âꞌdâ rõô lâ tã gólâ Yésũ drí ꞌẽlé rî yî ĩꞌdî, kôrô tã gólâ Yésũ drí âtálé rî yî drị̃ị̂ sĩ. Mã ndrê tã lârâkô dũû Yésũ drí ꞌẽlé rî trá, tã gólâ drí õjílã dũû pãzó ngá lãzé ꞌásĩ rî, gólâ înjî õjílã dũû trá mbârâkã líndrí õnjí kâ ꞌásĩ, gõꞌdá tã õnjí õjílã kâ âyê-âyê lâ sĩ. Tã ꞌẽꞌẽ ꞌdî yî âꞌdâ drị́-ãcê Yésũ kâ trá õjílã ânĩ ꞌbá Ôvârí ngálé sĩ rî ró, íyî lédrẽ-lédrẽ fẽlé õjílã ꞌbãlé rĩlí drị̃bạ́lạ́yị̂ ró mbârâkã tã õnjí kâ ꞌásĩ.
Gõꞌdá Márãkõ âꞌdâ íꞌdígówá âꞌdô-âꞌdô Yésũ kâ gõꞌdá lôsĩ gólâ drí îtõlé bãbãtízã Yõwánĩ drí ꞌẽlé drílâ rî vósĩ rî trá. Gõꞌdá gólâ âꞌdâ tã ífí kậyị̂ ạ̃dũkũ ꞌá rî yî trá, ãkpã drẽ Yésũ rî ípá ãkó, gõꞌdá ạ̃dũkũ lâ ꞌá rî gólâ âtâ tã trá dã tã Yésũ kâ lîdrízó õdrã ꞌásĩ rî ꞌá, gõꞌdá ngãngã gólâkâ ûrú ꞌálâ rî bê.
Click here to go to the Audio player and select 'Mark' from the player list (it appears when you click on the down arrow next to the book name).
